Ecuación de Drake

L'ecuación de Drake ye una ecuación pa estimar a cantidat de civilizacions en a nuestra galaxia, a Vía Lactia, susceptibles de poseyer emisions de radio detectables. Estió concebida por o radioastronomo y president de l'instituto SETI Frank Drake en 1961 mientres treballaba en l'Observatorio Nacional de Radioastronomía en Green Bank (Virchinia Occidental ,Estaus Unius).

$N=R^{*}\cdot f_p\cdot n_e\cdot f_l\cdot f_i\cdot f_c\cdot L$

an $N$ representa o numero de civilizacions que podrían comunicar-se en a nuestra galaxia, a Vía Lactia, y os factors:

• $R^{*}$ ye o ritmo anyal de formación d'estrelas "adecuadas" en a galaxia.
• $f_p$ ye a fracción d'estrelas que tienen planetas en a suya orbita.
• $n_e$ ye o numero d'ixas planetas que as suyas orbitas a la estrela no sían tan proxima como pa estar masiau calients, ni tan leixana como pa estar masiau frías pa poder ahuespedar vida.
• $f_l$ ye a fracción d'ixas planetas en os cuals a vida s'ha desembolicau.
• $f_i$ ye a fracción d'ixas planetas en os cuals a vida intelichent s'ha desembolicau.
• $f_c$ ye a fracción d'ixas planetas an a vida intelichent ha desembolicau una tecnolochía y intenta comunicar-se.
• $L$ ye o lapsus, mediu en anyos, entre o cual una civilización intelichent y comunicativa puede existir.

A causa d'a immensa cantidat d'estrelas y planetas que pueblan a nuestra galaxia podrían existir cientos u milars de civilizacions. Manimenos, dica hue, no nos hemos trobau con garra. Ixo conduz a la clamada paradoxa de Fermi.