Neutrino

Imachen d'a primera detección d'un neutrino.

O neutrino (de l'italiano neutrino "chiquet neutrón") ye una particla elemental sin carga electrica con una masa muit chicota y un spin 1/2.

O feito de tener spin fraccionario fa que os neutrinos formen parti d'a familia de particlas clamadas fermions, y adintro d'ista, en o grupo d'os leptons, que se caracterizan per no estar sozmetius a la interacción fuerte. Tampoco interactúan con a fuerza electromagnetica, nomás lo fan con a gravedat y con l'interacción feble.

Ye a segunda particla mas abundant de l'universo, dimpués d'os fotons, asinas trillons de neutrinos nos trascruzan cada segundo sin afectar-nos. Se conoixen tres menas de neutrinos (tamién clamaus "gustos"): o neutrino electronico, o neutrino muonico y o neutrino tauonico, simbolizaus como ${\nu }_e$, ${\nu }_{\mu }$ i ${\nu }_{\tau }$, respectivament. Una d'as trazas mas estranyas d'os neutrinos ye que oscilan entre os tres gustos mientres viacheyan, ye decir, no tienen un gusto fixo sino que van cambiando entre os tres conoixius.